تامين اتصال wireless الجزء التاني
بسم الله الرحمن الرحيم
هنبدأ بشرح كيفيه حماية إتصال الوايرليس ( الجزء الثانى )
استعرضنا ليكم فى الجزء الأول شوية إختيارات علشان تحمى إتصال الوايرليس الخاص بيك ، فى التدوينه دى هشرح طريقة إنك تخلى الشبكة الخاصة بيك ظاهرة ليك فقط ، ببساطة لأنك هتخليها Invisible
الفكرة إنك تخلى الشبكة بتاعتك مش ظاهرة لحد ، بحيث لو حد بحث عن شبكات WiFi مش هيلاقى الراوتر بتاعك من أصله ، طبعاً بتقول إذا كان هو مش هيلاقيها ، انا هلاقيها إزاى ؟
إنت هتعمل إتصال يدوى للراوتر بتاعك من موبايلك ، بيتم الإتصال ده إنك بدل ما تبحث عن الشبكات وتختار الراوتر بتاعك ، لأ إنت اللى هتكتب إسم الراوتر ( SSID ) وهتختار نوع التشفير وتكتب الباسوورد .
لو مش فاهم طبق الخطوات اللى جاية وهتفهم
إدخل على إعدادات الراوتر بتاعك بكتابة الـ IP ده فى الـ Browser :
192.168.1.1
ده الـ IP الخاص بمعظم الراوترات الموجودة ، لو مانفعش معاك ممكن تبحث فى جوجل عنه بكتابة " Default xxx IP " والـ xxx هنا نوع الراوتر بتاعك ( واحياناً هتلاقى الـ IP مكتوب تحت الراوتر نفسه ) .
أو عن طريق شاشه الدوس CMD عن طريق كتابه الأمر ipconfig هتلاقى كلمه Default Gateway و الرقم إللى جانبها هايكون IP الراوتر الخاص بك
بعد ما هيفتح هتدخل على إعدادات الـ Wireless الخاصة بالراوتر ( مش هعرف اقول على مكانها لإن كل راوتر وله المكان بتاعه ) بس هتوصلها بسهولة
هتلاقى اختيارات، إختار Invisible
دلوقتى تيجي للموبايل بتاعك ،،
إذا كنت أندرويد : هتفتح الـ Settings >> WiFi
وتدور على اوبشن إسمه Add Network
لما تلاقيه هتظهرلك خانة مكتوب عليها Network SSID ودى هتكتب فيها إسم الراوتر الخاص بيك ، اللى إنت مختاره اصلاً وكان بيظهرلك قبل كده .
خانة الـ Security هتختار منها نوع التشفير الخاص بيك ، وهو طبقاً للجزء الأول هيبقى WPA2 أو WPA/WPA2 .
خانة الـ Password هتكتب فيها الباسوورد بتاع الوايرليس عندك .
لو كنت iOS :هتفتح الـ Settings >> Wi-Fi
هتلاقى تحت خانة Choose a netword كلمة Other
هتختارها وتكتب قدام Name إسم الراوتر بتاعك ( SSID )
والـ Security هتختار WPA2
والـ Password هتكتب باسوورد الـ WiFi الخاص بالراوتر
بس خد بالك لإن أى غلطة فى كتابة الـ SSID أو فى الباسوورد ، الجهاز مش هيلاقى الراوتر ( الحروف الـ Capital و الـ Small بتفرق )
كده الجهاز بتاعك هيتصل بالراوتر ، ومش هتحتاج تعيد كل الخطوات دى كل مرة لإنه بعد كده هيتصل بيه تلقائى أول ما تفتح الـ WiFi .
إعمل Save وبكده ماحدش هيقدر يشوف شبكتك غيرك ..
ليست هناك تعليقات:
إرسال تعليق