بسم الله الرحمن الرحيم
هنكمل شرح كيفيه حماية إتصال الوايرليس ( الجزء الثالث )
استعرضنا ليكم فى الجزء الأول والثانى شوية إختيارات علشان تحمى إتصال الوايرليس الخاص بك ، فى التدوينه دى هنشرح طريقة بتأمن الراوتر بتاعك بشكل شبه كامل ، بحيث ماحدش يقدر يتصل بيه عبر الـ Wireless إلا إنت ،،
الخاصية اللى هنشرحها هى الـ MAC Filtering
الـ MAC المقصود هنا هو الـ MAC Address ، مش نظام Macintosh
للى مايعرفهوش منكم :
كلمة MAC إختصار لجُملة Media Access Control .
وكلمة Filtering بمعنى تصفية أو تنقية .
الـ MAC Address هو عبارة عن رقم تسلسلى بيميز جهازك ، بمعنى إن ماينفعش جهازين يبقى ليهم نفس الـ MAC Address .
دلوقتى إنت وأسرتك عندكم 4 موبايلات ، إنتم بس اللى بتستخدموا الـ Wifi بتاع الراوتر ، بخاصية الـ MAC Filtering إنت هتقول للراوتر ماتعملش Connect مع أى جهاز غير الأجهزة اللى ليها الـ MAC Address اللى انا قولتلك عليه ، ده بعد ما تكون حطيت الـ MAC Addresses الخاصة بأجهزتكم فى الـ Configuration بتاع الراوتر ،،
دلوقتى نطبق الخطوات مع بعض ،،
أول حاجه إنت محتاج تعرف الـ MAC Address الخاص بجهازك ، واللى هتدخله فى الراوتر .
لو إنت شغال بنظام أندرويد :
هتروح لـ Settings >> About Phone >> Status
وهتنزل لغاية ما تلاقى Wi-Fi MAC Address ، وهتلاقيه على صيغة :
xx:xx:xx:xx:xx:xx
لو إنت على نظام iOS :
هتروح لـ Settings >> General >> About
وتنزل لغاية ما تلاقى Wi-Fi Address ، هتلاقيه على نفس الصيغة .
بعد كده هتفتح إعدادات الراوتر زى ما قولنا قبل كده ، عن طريق 192.168.1.1 أو على حسب الراوتر اللى عندك ، هتروح عند الجزء الخاص بـ Wireless Security أو Advanced ، كل راوتر له المكان الخاص بيه ( لكن مش هيختلفوا كتير ) .
هتعمل Enable ، وتعمل Only Allow Computers listed to access wireless network ، بمعنى إنه هيسمح للأجهزة اللى إنت هتدخل الـ MAC Address بتاعها بس إنها تتصل بالشبكة ، هتنزل فى الخانة اللى تحت وتكتب الـ MAC Address اللى لقيته فى الموبايل زى ماهو بالظبط وتضغط Add ، وهتكرر الخطوة دى فى حالة إن عندك اكتر من جهاز وأما تخلص إضغط Apply .
بالشكل ده حتى لو سبت الشبكة بتاعتك من غير باسوورد أى جهاز هيحاول يتصل بالراوتر مش هيتم الإتصال ، وبكده هتكون أمنتها بشكل شبه كامل ..
0 تعليق
